無水蒸海鮮@Le Creuset 26cm 黑媽咪

已經太耐無寫Blog, 近年喜歡上煮食, 四周找食譜又不斷實習, 所以好忙, 加上被 Le Creuset 毒到不能自拔, 由初初買第一隻 Le Creuset 煲之後, 便毒癮發作, 不斷買買買, 由買煲至 Stoneware , 現在差不多整個廚房也是 Le Creuset了, 既然咁多又靚又好用工具, 當然要用盡佢地唔可以浪費啦!  因平日要返工, 所以每到星期六、日便是我同 LC 一齊入廚樂了, 咁耐無寫Blog, 第一章寫 LC 的有關食譜, 我當然是要推介 LC 至紅至大熱的無水蒸了, 第一次整這味無水蒸海鮮, 真係回味無窮, 除了零難度外, 又容易又鮮又好味, 完全將 LC 這無水蒸特點發揮得完美無缺, 真係毒得有道理, 講完一大堆自我感覺良好說話後, 應該開始介紹比大家我的無水蒸海鮮了 ::vv4001

要玩無水蒸也須要基本方法及層次, 不過也非常簡單, 先由最底層講, 最底層可鋪冬瓜、蘿蔔或其他瓜類, 之後一層可以放菜, 選擇一些煲霖了仍好味的菜更好, 如小棠菜、大白菜, (黃芽白)等, 之後便可以一層一層放上海鮮了, 由最難熟的海鮮開始放, 鮑魚可圍邊, 蝦就最後放上, 之後中火約6分鐘, 小火約10分鐘, 熄火焗約10分鐘。

時間可以自己掌握, 因為須時乎自己放多少材料及海鮮的size 大小, 直至全部海鮮熟便可, 由於瓜菜及海鮮在蒸過程也會出水, 所以係完全唔使加水, 當蒸熟後海鮮下已經出了海鮮湯可飲或食完海鮮可當湯底加上粉麵一起享用, 此無水蒸海鮮真係令海鮮更鮮甜, 所有海鮮精華全保存在煲內, 確是原汁原味, 在街外食的美味佳餚全是潻加了味精, 這無水蒸海鮮鍋無潻加也可食出如此美味, 越來越愛上在家入廚了。

就是因為太好味又方便, 我已經 Encore 再 Encore 在家玩無水蒸海鮮了, 希望大家也來試試啦! ::vv4059

因為在家經常玩無水蒸, 所以補拍了更多詳細圖片供大家參考 :

今次買了冬瓜, 黃牙白, 毛蟹、大鮑魚、花甲及聖子皇, 數量如下:



全部洗好後便可以開始層層疊了

 1. 底層先鋪瓜

 2. 之後鋪菜

 3. 跟住鋪最難及比較耐熟之海鮮, 我就鋪毛蟹及大鮑魚

 4. 最後鋪上聖子皇, 而花甲就圍邊

 5. 之後蓋上蓋開火

 6. 由於我未先煮菜, 而是全部一起蒸, 所以我開中火後約維持7分鍾才調較至小火, 小火再煲約8分鐘, 之後熄火焗8分鐘

(其實時間每次我也會變動, 因為要看看當日的海鮮份量及大小再自己調整時間, 如果想更容易成功, 可以在鋪好瓜及菜後不要一齊放海鮮, 可以馬上開中火將菜先煲至熱, 之後才一層層放上海鮮, 由於菜及煲已熱, 所以放上海鮮後中火4分鐘, 小火8-10分鐘, 熄火焗約8-10分鐘便可, 焗完可以看看海鮮熟未, 如果有些海鮮未熟, 只要在開火加熱再熄火焗一陣便可進食了, 沒有一定的時間, 整得多便可以掌握份量多少作時間調較了)

原煲上枱, 非常原味鮮甜  

 沒有加水下, 原煲煮完也自己出了咁多水, 這煲水是海鮮精華所在, 可以直接連瓜菜一起食, 或是也可食完海鮮後再用這海鮮湯底來加粉麵或加在飯上變成湯飯享用, 鮮甜無比呢!

 記得如果加蟹, 切記蟹原隻放不須先切開, 這樣蟹才可保原味呀!

 慢慢享用, 完全不須加任何醬油已經食出海鮮的味道, 很讚!