清熱去濕美白@檸檬薏米水(附食譜)

近日愛上飲檸檬飲品, 自從煲了這檸檬薏米水後, 更成為近日至愛, 大家如果喜歡檸檬一定要試, 不論熱飲或凍飲都美味非常, 而且健康有益, 適合一家大細, 快快動手啦!

 

準備之材料︰
生薏米 30克  (生薏米和熟薏米份量相等便可, 如想煲多些便調至生熟薏米份量相等便可)
熟薏米 30克
水 2.5 公升 至3公升
冰糖 60克 (可自行調整甜度加減冰糖份量)
檸檬 3個   (我覺得3個份量最洽當, 但如果唔想檸檬味太重, 可以改為 1 個或2 個)

做法︰
1. 生熟薏米洗淨浸半個鐘至一個鐘。 (因我用LC OR STAUB, 所以冇浸就直接煲, 煲完用焗方法使薏米焗透)

2. 先煲滾2.5至3 公升水, 再倒入生熟薏米, 滾後轉細火煲1個鐘。(如用LC OR STAUB, 滾後便較至小火煲約半小時便可熄火再加冰糖再焗半小時便可)

3. 加冰糖後可先試甜度, (如想飲時再加蜂蜜飲, 便不須太甜) , 待冰糖溶化可關火, 再等薏米水轉涼就可加入檸檬。(或熄火15分鐘前加入檸檬也可)

4. 然後放入雪柜雪凍即可飲用。

 檸檬可先用盬擦洗乾淨, 再去皮留用, 用刀批去白色部份不要, (因白色的皮會令飲品變苦) 再將檸檬切 成小塊

 待薏米水熄火前10至15分鐘便可加入檸檬皮及檸檬肉, 熄火後待涼了便可入樽, 也可先飲些熱的檸檬薏米水, 其餘待涼後便可放雪柜了, 飲用時也可加些蜂蜜更美味!